Presentáronse en Santiago os libros do Camiño Inglés e Camiño Portugués no que se recollen as peripecias desta simpática familia no seu percorrido para chegar a Compostela e que nos contan en galego, castelán e inglés!
No acto acompañáronnos os seus creadores, os escritores Toño Núñez e Xoán Carlos García Porral e o ilustrador Gabi Iglesias Sanmartin. Así como o secretario xeral de Política Lingüística, Valentín García; e a directora de Turismo de Galicia, Nava Castro.
Os libros
Os Balbinos son unha colección de catro libros infantís-xuvenís, en tapa dura, ilustrados a toda cor e narrados en tres idiomas: galego, castelán e inglés. Neles recóllense as aventuras da familia dos Balbinos, os pequenos Lúa e Bal e os seus pais Lena e Lino, nas súas andainas polas distintas rutas do Camiño de Santiago nos tramos galegos.
Camiño Francés e Ruta da Prata foron as primeiras publicacións da colección ás que agora se suman o Camiño Inglés e o Camiño Portugués.
Nesta nova camiñata, a que ocupa o Camiño Inglés, o lector acompañará á simpática familia descubrindo, xunto a eles, os distintos lugares de interese dos concellos polos que transcorre esta ruta, coñecendo os seus atractivos culturais, paisaxísticos, festivos, gastronómicos, relixiosos... que nesta ocasión os levará a coñecer a historia dos concellos polos que transcorre o Camiño Inglés, pasando por Ferrol, Narón, Neda, Fene, Cabanas, Pontedeume, Miño, Paderne, Betanzos, Abegondo, Mesía, Ordes, Oroso ata rematar en Santiago de Compostela.
Do mesmo xeito, a seguinte obra, a que ocupa o Camiño Portugués, centrará as aventuras da familia naqueles lugares polos que transcorre dita ruta dende Tui pasando por O Porriño, Mos, Redondela, Soutomaior, Vilaboa, Pontevedra, Barro, Portas, Caldas de Reis, Valga, Pontecesures, Padrón, Brión, Teo, Rois, Ames ata chegar a Santiago de Compostela.
Esta colección de libros infantís-xuvenís, editada por Edicións Fervenza, enmárcase dentro das axudas de dinamización do Xacobeo 2021, «O teu Xacobeo» da Xunta de Galicia.