Poemas de amor en outono

No medio do camiño da súa vida, Toño Núñez entende que debe facer un alto, un suma e segue poético, e reunir neste volume composicións que celebren os gozos que foron e fagan balance das coitas padecidas, que relancen a memoria dos días ledos e mitiguen as sombras do desamparo. Nesta terceira edición, revisada e aumentada, engade novos materiais poéticos no esencial coincidentes coa estética e as temáticas das composicións ás que se suman. Deste xeito, o quinteto adicionado abunda no neotelurismo e na cardiopaisaxe de mostras anteriores e incide na heroica memoria do rural que esfarela, no paradiso da infancia e da adolescencia, na gabanza da estirpe e no compromiso ecopoético e prosocial, sen esquecer a lírica amatoria.